Расонаҳои Афғонистон бо такя ба манобеи маҳаллӣ мегӯянд, дар идомаи даргириҳо миёни гурӯҳи террористии Толибон ва ҷабҳаҳои зидди ин гурӯҳ дар Бадахшон, ду паҳподи Толибон аз ҷониби ҷанговарони Ҷумъахон Фотеҳ сарнагун шудаанд.

Манобеъ рӯзи панҷшанбе, 13-уми август гуфтаанд, ки ин ду паҳпод дар ноҳияи Нусайи Бадахшони Афғонистон сарнагун шудаанд.

Ба гуфтаи манобеъ, Толибон дар вокуниш ба ин таҳаввулот қасд доранд имшаб аз роҳи Куфоб ба неруҳои Ҷумъахон Фотеҳ, фармондеҳи норозии ин гурӯҳ, ҳамла кунанд.

Ин рӯйдодҳо дар ҳолест, ки даргириҳо миёни Толибон ва ҷабҳаҳои зидди Толибон дар минтақаҳое аз Бадахшон афзоиш ёфтааст.

Пештар расонаҳои Афғонистон гуфта буданд, ки Толибон неруҳои кӯмакрасони худро барои ҷанг бо Ҷумъахон Фотеҳ тавассути чархбол ба минтақаи даргир мефиристоданд.

Дар пайи ин даргириҳо, манобеъ, ҳамчунин, аз суқути як чархболи Толибон дар ноҳияи Нусай ва кушта шудани ҳафт сарнишини он хабар додаанд.

Dialog.tj