Бонки миллии Тоҷикистон бо нашри иттилоияе аз паҳн шудани навъи нави қаллобӣ ба шаҳрвандон ҳушдор дод.

Манбаъ навиштааст, ки дар шабакаҳои иҷтимоӣ ва паёмрасонҳо эълонҳои бардурӯғ оид ба мусоидат дар гирифтани қарзҳои имтиёзнок паҳн гардида истодаанд.

Гуфта мешавад, ки барои фиреб додани шаҳрвандон қаллобон аз ҳуҷҷатҳои қалбакӣ, логотип ва унсурҳои сохтаи расмӣ, фикру мулоҳизаҳои бардурӯғ ва ботҳои сохта истифода мебаранд.

Дар ин росто, Бонки миллии Тоҷикистон ҳушдор медиҳад, ки шаҳрвандон ба шахсони ношинос ҳеҷ гоҳ маблағ интиқол надиҳанд ва маълумотро танҳо аз манбаъҳои расмӣ дастрас намоянд, зеро Бонки миллии Тоҷикистон ба шахсони воқеӣ хизматрасонии бонкӣ анҷом намедиҳад, ба аҳолӣ қарз намедиҳад, барои интиқоли маблағ аз шаҳрвандон дархост намекунад ва тавассути паёмрасонҳо ҳуҷҷатҳои расмӣ ё шаҳодатномаи кормандонро ирсол намекунад.

Ҳамчунин, Бонки миллии Тоҷикистон маслиҳат медиҳад, ки дар ҳолати дучор шудан ба ҳолатҳои монанд шаҳрвандон корти бонкии худро масдуд намоянд, ба ташкилоти қарзии молиявии хизматрасон муроҷиат кунанд ва ба мақомоти ҳифзи ҳуқуқ хабар диҳанд.

Dialog.tj