12-уми август дар шаҳри Сеул бо иштироки намояндагони Дастгоҳи иҷроияи Президенти Ҷумҳурии Тоҷикистон, Вазорати саноат ва технологияҳои нави Ҷумҳурии Тоҷикистон, Сарраёсати геологияи назди Ҳукумати Ҷумҳурии Тоҷикистон, Вазорати савдо, саноат ва захираҳои Ҷумҳурии Корея, Корпоратсияи Корея оид ба барқарорсозии конҳо ва истихроҷи маъданҳо (KOMIR), Институти илмҳои геологӣ ва захираҳои минералии Корея (KIGAM), Бонки содиротии Корея Кексимбонк ва бахши хусусии ду кишвар нахустин Форуми маъданҳои муҳими Тоҷикистону Корея баргузор гардид.

Тавре ки Вазорати саноат ва технологияҳои нави Ҷумҳурии Тоҷикистон хабар медиҳад, дар чорабинии мазкур дурнамои ҳамкориҳо дар соҳаи истихроҷи маъданҳо ва металҳои қиматбаҳо, таъмини талабот ба маъданҳои муҳим ва устувории занҷираҳои таъминот баррасӣ шуд.

Дар чорабинӣ имкониятҳои Тоҷикистон дар самти захираҳои маъдании муҳим муаррифӣ гардида, масъалаи ҳамкории муштарак дар самти иктишофи захираҳои зеризаминӣ ва таҷрибаи Корея дар соҳаи рушди занҷираҳои таъминот муаррифӣ шуданд.

Гуфта мешавад, ки дар қисми ниҳоии чорабинӣ вохӯриҳои корӣ дар шакли B2B байни намояндагони мақомоти давлатӣ, бахши хусусӣ, аз ҷумла "Пакруд", "Талко голд", "Апрелевка", "Канзи диёр" , "Анзоб",  "ШКС Тоҷикистону Чин", "Дастрас 2011"ва "ТBЕА" бо ширкатҳои кореягӣ, доир шуданд, ки ҷонибҳо имкониятҳои ҳамкории мустақим, татбиқи лоиҳаҳои муштарак ва ҷалби сармоягузориҳоро баррасӣ карданд.

Dialog.tj