“Файненшл Таймз” (Financial Times) дар остонаи панҷсола шудани ҳокимияти гурӯҳи террористии Толибон дар Афғонистон мегӯяд, ки ин гурӯҳ пас аз тасаллут бар ин кишвар, яке аз саркӯбгартарин ва занситезтарин низомҳоро эҷод кардаанд.

“Файненшл Таймз” дар мақолае, ки рӯзи душанбе, 10-уми август нашр кардааст, гуфтааст, ки Толибон занон ва духтарони Афғонистонро аз кор, омӯзиш ва рафтуомади озодона маҳрум карда ва онон бо маҳдудиятҳо ва хушунатҳои густарда рӯбарӯ ҳастанд.

Дар ин мақола омадааст, ки барои занон ва духтарони Афғонистон, ҷанг ҳамчунон идома дорад ва онон барои расидагӣ ба ин ҳақи худ ва дарёфти ҳимоят, роҳи муассире дар дохили Афғонистон надоранд.

Ин рӯзнома афзудааст, ки додгоҳҳои Толибон низ сиёсатҳои саркӯбгаронаи ин гурӯҳро иҷро мекунанд ва дар сатҳи минтақаӣ низ додгоҳе вуҷуд надорад, ки занон битавонанд ба он муроҷиат кунанд.

Ба навиштаи ин рӯзнома, танҳо роҳи боқимонда барои онон, додгоҳҳои байналмилалӣ монанди Додгоҳи ҷиноии байналмилалӣ (ICC) аст: додгоҳе, ки соли гузашта барои раҳбарони Толибон ба далели ҷиноятҳо алайҳи занон ва духтарон ҳукми боздошт содир кард.

“Файненшл Таймз” ҳушдор додааст, ки фишорҳои хориҷӣ бар ин додгоҳ, ба вижа аз сӯйи давлати Амрико, метавонад адолати байналмилалиро тазъиф ва заминаи боздоштро барои омилони ҷиноятҳои ҷангӣ ва ҷиноят алайҳи башарият фароҳам кунад.

Dialog.tj