Ҳуҷуми 70 ҳазор муҳоҷир аз Марокаш ба минтақаи Сеутаи Испания ва кушта шудани 88 нафар, бори дигар буҳрони муҳоҷират дар Аврупоро ба меҳвари ихтилофҳои дохилии Иттиҳоди Аврупо табдил додааст.

Ворид шудани ҳудуди 70 ҳазор нафар аз Марокаш ба Сеута, минтақаи таҳти назорати Испания дар шимоли Африқо, дар рӯзҳои охир ба буҳрони нави дипломатӣ дар Иттиҳоди Аврупо табдил шудааст.

Дар ҷараёни ин мавҷи ногаҳонии муҳоҷират, бисёриҳо барои гузаштан аз марз чандин километр шино кардаанд, то аз монеаҳои сарҳадӣ гузаранд. Дар ин миён, 88 нафар танҳо дар давоми 48 соат ғарқ шудаанд. Полиси Испания бо ҳамкории мақомоти Марокаш бештари муҳоҷиронро ба ин кишвар баргардондааст.

Ин ҳодиса дар ҳоле рух додааст, ки Иттиҳоди Аврупо ҳанӯз бо паёмадҳои буҳрони муҳоҷирати соли 2015 дасту панҷа нарм мекунад: буҳроне, ки беш аз як миллион нафарро ба Аврупо овард ва ихтилофҳои шадидеро миёни кишварҳои узв бар сари тақсими масъулияти қабули муҳоҷирон ба вуҷуд овард.

Ба навиштаи таҳлилгарон, мавҷи ахир танҳо натиҷаи паҳн шудани овозаҳо дар шабакаҳои иҷтимоӣ ё афзоиши ногаҳонии шумораи афроде, ки дар ҷустуҷӯи зиндагии беҳтар дар Аврупо ҳастанд, нест, балки бозтоби мушкилоти амиқи иқтисодӣ ва сиёсӣ дар шимоли Африқо ва набуди сиёсати ҳамоҳанг дар Аврупост.

Дар минтақаҳои шимолии Марокаш, фарқи иқтисодӣ миёни ҷомеаҳои маҳаллӣ ва Сеута бисёр чашмгир аст. Маҷмуи маҳсулоти дохилӣ ба ҳар сари аҳолӣ дар Марокаш дар соли 2024 тақрибан 4 ҳазору 153 доллар буд, дар ҳоле ки ин рақам дар Сеута ба тақрибан 26 ҳазору 774 доллар мерасид. Норасоии имкониятҳои корӣ ва таҳсил аз муҳимтарин омилҳоест, ки муҳоҷирон барои ҳаракат ба сӯйи Аврупо унвон мекунанд.

Ҳамзамон, нақши Марокаш низ мавриди таваҷҷуҳ қарор гирифтааст. Ин кишвар дар даҳсолаҳои гузашта бар ивази гирифтани кумакҳои молӣ ва имтиёзҳои дипломатӣ бо Иттиҳоди Аврупо барои назорати муҳоҷират ҳамкорӣ кардааст. Бо ин ҳол, бархе нозирон эҳтимол медонанд, ки мавҷи ахир бидуни чашмпӯшӣ ё ҳамкории марзбонони Марокаш наметавонист бо чунин фарогирие рух диҳад.

Дар дохили Аврупо низ вокунишҳо бори дигар шикофи сиёсӣ бар сари муҳоҷиратро ошкор кардааст. Ҷорҷия Мелонӣ, нахуствазири ростгарои Италия, ин ҳодисаро намунае аз таҳдиди муҳоҷирати ғайриқонунӣ барои амнияти марзҳои Аврупо донистааст. Чанд кишвари аврупоӣ низ хостори маҳдуд кардани иштироки Испания дар минтақаи Шенген шудаанд.

Нишасти изтирории вазирони корҳои дохилии Иттиҳоди Аврупо дар 4-уми август дар ниҳоят ба афзоиши буҷети ҳифзи марзҳо, ҳамкорӣ бо кишварҳои африқоӣ ва ташдиди раванди ихроҷи муҳоҷирон сабаб шудааст.

Бо ин ҳол, таҳлилҳо ҳушдор медиҳанд, ки тамаркуз танҳо бар назорати марзҳо бидуни ҳалли решаҳои иқтисодӣ, заъфи ҳукуматдорӣ ва нобаробарӣ дар кишварҳо буҳрони муҳоҷиратро ҳал нахоҳад кард ва эҳтимолан Аврупо бори дигар шоҳиди мавҷҳои ногаҳонӣ ва густардаи муҳоҷират хоҳад шуд.

Dialog.tj