Сухангӯи артиши Яман эълом кардааст, ки ҳусиҳо ҳамлаҳои худро ба шаҳри бандарии Ал-Махо дар соҳилҳои Баҳри Сурх аз сар гирифтаанд.

“Ал-Ҷазира”, субҳи рӯзи душанбе, 10-юми август гузориш дода, ки ҳусиҳо чандин мушаки баллистикӣ ва паҳпод ба ин шаҳри бандарӣ партоб кардаанд.

Бар асоси гузориш, Яҳё Сариъ, сухангӯйи ҳусиҳо гуфтааст, ки ба марказҳои неруҳои вобаста ба Арабистони Саудӣ ҳамла кардаанд.

Ӯ ҳамчунин, иддао кардааст, ки дар ин ҳамлаҳо анборҳои силоҳҳои неруҳои артиши Яманро ҳадаф гирифтаанд.

Ин дар ҳолест, ки ҳамлаи рӯзи гузаштаи ҳусиҳо ба ин бандар, ба гуфтаи артиши Яман, боиси кушта шудани дастикам ҳафт тан ва захмӣ шудани даҳҳо нафар шудааст.

Dialog.tj