Бинобар иттилои маркази матбуоти Вазорати молия, Созишномаи қарзии иловагӣ оид ба лоиҳаи «Таҳкими шабакаи тақсимоти барқ дар шаҳри Кӯлоб дар робита ба лоиҳаи «Кам намудани талафоти нерӯи барқ дар вилояти Хатлон» байни Ҷумҳурии Тоҷикистон ва Бонки аврупоии таҷдид ва рушд ба имзо расид.

Гуфта мешавад, ки маблағи қарзи иловагӣ дар доираи созишномаи мазкур 10 миллион евроро ташкил дода, онро вазири молияи Ҷумҳурии Тоҷикистон ва намояндаи ваколатдори Бонки аврупоии таҷдид ва рушд ба имзо расониданд.

“Ҳадафи асосии лоиҳа кам намудани талафоти техникӣ ва тиҷоратии нерӯи барқ тавассути қисман таҷдиди шабакаҳои тақсимоти нерӯи барқ, ҷорӣ намудани низоми муосири баҳисобгирӣ ва биллинг, инчунин, насбу васли ҳисобкунакҳои интеллектуалии электронии нерӯи барқ мебошад”, - навиштааст манбаъ.

Иттилоъ дода мешавад, ки татбиқи лоиҳа ба баланд бардоштани самаранокии фаъолияти шабакаҳои тақсимоти нерӯи барқ, коҳиш додани талафоти нерӯи барқ, беҳтар намудани сифати таъминоти барқ ба истифодабарандагон ва таҳкими эътимоднокии низоми энергетикии вилояти Хатлон мусоидат менамояд.

Dialog.tj