Фирдавс Толибзода, раиси Бонки миллии Тоҷикистон бо намояндагони Барномаи муштараки стипендиявии Ҷопон ва Бонки Ҷаҳонӣ оид ба таҳсилоти баъдидипломӣ, директори Дафтари минтақавии Хазинаи Байналмилалии Асъор барои Осиё ва Уқёнуси Ором Такаши Нагаока ва мудири барномаҳои Дафтари минтақавии ХБА барои Осиё ва Уқёнуси Ором Саика Кин мулоқот намуда, масъалаҳои густариши ҳамкорӣ ва рушди иқтидори касбии мутахассисони низоми бонкии кишварро баррасӣ кард.

Тавре ки маркази матбуоти Бонки миллии Тоҷикистон хабар медиҳад, дар вохӯрӣ Фирдавс Толибзода қайд кард, ки Бонки миллии Тоҷикистон дар марҳилаи муҳими таҳаввулоти институтсионалӣ қарор дошта, ҷиҳати ташаккули як бонки марказии муосир ва устувор ислоҳоти муҳимро амалӣ менамояд.

“Ин раванд, ба таҳкими низоми сиёсати пулию қарзӣ, такмили танзиму назорати бонкии мутобиқ ба стандартҳои байналмилалӣ, рушди таҳлили макроиқтисодӣ ва бахши молиявӣ, суръат бахшидани рақамикунонӣ, тақвияти идоракунии институтсионалӣ ва такмили низоми идоракунии хавфҳо равона шудааст”, - навиштааст манбаъ.

Гуфта мешавад, ки ҷонибҳо ҳамчунин зарурати таҳкими ҳамкории минбаъда, ҷалби бештари мутахассисони ҷавону соҳибистеъдоди Бонки миллии Тоҷикистон ба барномаи JISPA ва рушди ҳамкорӣ дар самтҳои таҳсилоти роҳбарӣ, таҳқиқоти илмӣ, муколамаи сиёсӣ ва рушди иқтидори институтсионалиро баррасӣ намуданд.

Dialog.tj