Давлати нави Британия дар ҳоли баррасии бозкушоии парвандаи Ҷеффрӣ Эпштейн ва ташкили як кумитаи таҳқиқоти умумӣ дар бораи фаъолияти ин ҷинояткори маъруфи ҷинсӣ дар хоки Британия мебошад.

Ба гузориши расонаҳо Алекс Дэвис-Ҷонс, вазири умури қурбониён дар парвандаи Ҷеффрӣ Эпштейн, дар суҳбат бо “Би-би-сӣ” гуфтааст, ки Энди Бернем, нахуствазири Британия, қасд дорад бо қурбониёни Эпштейн дидор кунад ва пас аз он эҳтимоли ташкили таҳқиқоти умумӣ дар бораи паҳлуҳои ин парванда вуҷуд дорад.

Ӯ гуфтааст: “Мо ин мавзуъро баррасӣ мекунем.”

Ҳамзамон, полиси Британия низ дар ҳоли таҳқиқи чандин ҳолатҳои ҷиноии марбут ба Эпштейн мебошад. Ин ҳолатҳо аз озори ҷинсии кӯдакон ва қочоқи занон тавассути фурудгоҳҳои Британия то сӯистифода аз мавқеъҳои ҷамъиятиро дар бар мегиранд.

Тақрибан ҳафт сол пас аз марги Эпштейн дар як зиндон дар Амрико, ҷанҷоли марбут ба ӯ доираҳои сиёсии Британия ва Амрикоро такон додааст. То кунун ин парванда ба боздошти Эндрю Маунтбеттен-Виндзор, бародари подшоҳи Британия ва хориҷ шудани ӯ аз хонаводаи шоҳӣ, инчунин, Питер Манделсон, сафири пешини Британия дар Иёлоти Муттаҳида, сабаб шудааст.

Ба гуфтаи вазири умури қурбониён, дар сурати ташкили кумитаи таҳқиқ, эҳтимол дорад иттиҳомҳои матраҳшуда алайҳи Муҳаммад Ал-Фоид, сармоядори мисрӣ ва соҳиби фурӯшгоҳи Ҳарродс, ки аз сӯйи садҳо нафар ба таҷовуз ва озори ҷинсӣ муттаҳам шудааст, низ дар чорчӯби ин баррасиҳо мавриди таҳқиқ қарор бигирад.

Dialog.tj