Артиши Эрон эълом кардааст, ки дар як ҳамлаи паҳподӣ таъсисоти низомии Иёлоти Муттаҳида дар пойгоҳи ҳавоии “Аҳмад ал-Ҷобир”-и Кувайтро ҳадаф қарор додааст. Ба гуфтаи мақомоти эронӣ, ин ҳамла дар посух ба ҳамлаҳои ахири Вашингтон анҷом шудааст.

Шабакаи “Ал-Ҷазира” рӯзи ҷумъа, 31-уми июл, гузориш додааст, ки артиши Эрон гуфтааст, ин ҳамла бо истифода аз паҳподҳо анҷом шуда, сомонаҳои иртибототи моҳвораӣ ва анборҳои таҷҳизоти низомӣ ҳадаф қарор гирифтаанд.

Бар асоси ин гузориш, артиши Эрон афзудааст, ки амалиёти мазкур дар вокуниш ба ҳамлаи Иёлоти Муттаҳида ба як хонаи истиқоматӣ дар ҷазираи Қишм анҷом дода шудааст.

Эрон ҳамчунин, таъкид кардааст, ки пойгоҳи низомии “Аҳмад ал-Ҷобир” яке аз марказҳои муҳимми Амрико барои анҷоми амалиётҳои иктишофии ҳавоӣ ва пуштибонии низомӣ дар минтақа ба шумор меравад.

Ин дар ҳолест, ки танишҳо миёни Эрон ва Амрико дар моҳҳои ахир афзоиш ёфта, ду тараф пас аз ҳамлаҳои мутақобил ҳамдигарро ба анҷоми иқдомҳои низомӣ муттаҳам мекунанд.

То кунун мақомоти Амрико ва Кувайт дар бораи ин иддаои Эрон изҳори назари расмӣ накардаанд.

Dialog.tj