Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон бо такя ба маълумоти Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ медиҳад, ки аз 29-уми июл то 1-уми августи соли равон дар бархе минтақаҳо хавфи сар задани сел пешгӯӣ мешавад.

Гуфта мешавад, ки бинобар баланд шудани ҳарорати ҳаво дар ноҳияҳои доманакӯҳию кӯҳии тобеи ҷумҳурӣ, вилояти Суғд ва ноҳияҳои ғарбии Вилояти Мухтори Кӯҳистони Бадахшон хавфи сар задани селҳои хусусияти пиряхӣ дошта пешгӯӣ мегардад.

Афзуда мешавад, ки дар натиҷаи баланд шудани ҳарорати ҳаво дар ҳавзаҳои дарёҳои Панҷ, Зарафшон ва Вахш баландшавии сатҳи оби дарёҳо дар назар дошта мешавад.

Бо мақсади пешгирии оқибатҳои эҳтимолии офатҳои табиӣ, Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ба мақомоти дахлдор дастур додааст, ки қувва ва воситаҳоро дар ҳолати омодагии доимӣ нигоҳ дошта, ҳамоҳангиро бо мақомоти иҷроияи маҳаллии ҳокимияти давлатӣ ва комиссияҳои ҳолатҳои фавқулода тақвият бахшида, дар минтақаҳои хавфнок навбатдории шабонарӯзиро ташкил намоянд.

Dialog.tj