Хадамоти алоқаи назди Ҳукумати Ҷумҳурии Тоҷикистон аз оғози қабули довталабон ба "Школа 21" хабар дод.

Манбаъ навиштааст, ки шаҳрвандони аз 18-сола боло, новобаста аз сатҳи таҳсилот, таҷрибаи корӣ ва ё дониши барномасозӣ, метавонанд дар "Школа 21" иштирок намоянд. Омӯзиш пурра ройгон буда, ба стандартҳои байналмилалӣ мутобиқ мебошад.

"Қабули довталабон аз чанд марҳила иборат буда, баъди бақайдгирӣ ва санҷиши онлайн, иштирокчиён ба марҳилаи 14-рӯзаи «бассейн» роҳ меёбанд. Пас аз гузаштани интихоб, онҳо метавонанд дар яке аз самтҳои технологияҳои иттилоотӣ, аз ҷумла таҳияи нармафзор, амнияти киберӣ, таҳлили додаҳо ва дигар ихтисосҳои муосир таҳсил намоянд", - афзудааст манбаъ.

Гуфта мешавад, ки «Школа 21» усули омӯзиши «ҳамсол ба ҳамсол»-ро истифода мебарад ва хатмкунандагони он имкони дарёфти ҷойи корро дар ширкатҳои бузурги рақамӣ ва стартапҳо пайдо мекунанд.

Иттилоъ дода мешавад, ки лоиҳаи мазкур аз ҷониби Хадамоти алоқаи назди Ҳукумати Ҷумҳурии Тоҷикистон ва Агентии инноватсия ва технологияҳои рақамии назди Президенти Ҷумҳурии Тоҷикистон дар ҳамкорӣ бо ширкати «Сбер» амалӣ мегардад.

Dialog.tj