Аксҳои моҳвораӣ нишон медиҳанд, ки артиши Чин 12 фарванд ҷангандаи радаргурези насли панҷуми “J-20”-ро дар ду пойгоҳи низомии наздик ба марзи Ҳиндустон мустақар кардааст.

Бар асоси гузоришҳо, 8-тои ин ҷангандаҳо дар пойгоҳи ҳавоии Хутан дар минтақаи Синзян ва 4-тои дигари он дар пойгоҳи Дамшунг дар Тибет ҷойгир шудаанд. Ин иқдом дар ҳоле сурат мегирад, ки танишҳои марзӣ миёни Чин ва Ҳиндустон ҳамчунон идома дорад.

Шабакаи “Эн-ди-ти-ви” (NDTV) гузориш додааст, ки ин бузургтарин тамаркузи ҷангандаҳои насли панҷуми Чин дар пойгоҳҳои рӯ ба марзи Ҳиндустон то имрӯз ба ҳисоб меравад.

Тибқи ин гузориш, Ҳиндустон ҳанӯз дар ихтиёри худ ҷангандаи амалкунандаи насли панҷум надорад ва неруҳои ҳавоии он асосан ба 36 ҷангандаи “Rafale” ва ҳавопаймоҳои кӯҳнатари “Su-30” такя мекунанд.

Ин таҳаввул дар ҳоле сурат мегирад, ки рақобати низомӣ ва ихтилофҳои марзӣ миёни ду қудрати ҳастаии Осиё дар солҳои охир афзоиш ёфтааст.

Dialog.tj