Агентии Тоҷикстандарт бо нашри иттилоияе ба шаҳрвандон ҳушдор дод, ки аз харидории об ва нӯшокиҳое, ки зери таъсири бевоситаи нурҳои офтоб бедоштани ашёи муҳофизатӣ нигоҳ дошта мешаванд, худдорӣ намоянд.

Манбаъ навиштааст, ки нигоҳдории тӯлонии об ва нӯшокиҳо дар зери таъсири бевоситаи нурҳои офтоб ва ҳарорати баланди ҳаво метавонад ба сифати маҳсулот таъсири манфӣ расонад. Аз ин рӯ, аз харидории маҳсулоте, ки муддати дароз дар ҷойҳои гарм ва зери нури мустақими офтоб бе воситаҳои муҳофизатӣ нигоҳ дошта шудаанд, худдорӣ намудан ба манфиати саломатии истеъмолкунанда мебошад.

Масъулин изҳори нигаронӣ кардаанд, ки мушоҳида мешавад, ки нӯшокиҳои ташнашикан ва ширину газдор дар нуқтаҳои фурӯш ё анборҳо зери таъсири мустақими нурҳои офтоб ва ҳарорати баланди ҳаво нигоҳ дошта мешаванд.

“Ба соҳибкорон ва фурӯшандагон низ тавсия дода мешавад, ки ҳангоми интиқол, нигоҳдорӣ ва фурӯши обҳои нӯшокӣ ва нӯшокиҳои ширину газдор талаботи муқарраргардидаи бехатарии маҳсулотро қатъиян риоя намоянд. Маҳсулот бояд дар ҷойҳои салқин ва аз таъсири бевоситаи нурҳои офтоб муҳофизатшуда нигоҳ дошта шавад”, - афзудааст манбаъ.

Dialog.tj