Гурӯҳи террористии Толибон дар Донишгоҳи Форёб ба донишҷӯён ҳушдор додаанд, ки дар сурати надоштани риш, иҷозаи дифоъ аз рисолаи хатми худро нахоҳанд дошт ва ҳамчунин, аз таътил маҳрум хоҳанд шуд.

Манобеъ аз Форёби Афғонистон рӯзи чаҳоршанбе, 22-уми июл дар гуфтугӯ бо рӯзномаи “8-и субҳ”-и кишвар таъйид кардаанд, ки ин дастур аз ҷониби “Кумитаи даъват ва иршод”-и Донишгоҳи Форёб ба донишҷӯён расонида шудааст.

Толибон бо нашри мактубе дастур додаанд, он даста аз донишҷӯёне, ки риши худро бо дастгоҳ кӯтоҳ карда ё тарошида бошанд, иҷозаи дифоъ аз рисолаи хатмро надоранд.

Манобеъ мегӯянд, ин қарор нигарониҳоеро дар миёни бархе аз донишҷӯёни Донишгоҳи Форёб ба вуҷуд овардааст.

Ин дар ҳолест, ки пас аз тасаллути дубораи гурӯҳи террористии Толибон дар Афғонистон, духтарони донишҷӯ аз рафтан ба донишгоҳ манъ шуда ва донишҷӯёни писар бо маҳдудиятҳои шадид аз ҷониби ин гурӯҳ рӯбарӯ шудаанд.

Расонаҳои хабарии Афғонистон пештар бо такя ба манобеи маҳаллии худ гузориш дода буданд, ки теъдоде аз донишҷӯёни Донишгоҳи Шайх Зайд дар Хӯст, ба далели надоштани риш аз хобгоҳи ин Донишгоҳ хориҷ карда шудаанд.

Dialog.tj