Дар нишасти матбуотии Вазорати корҳои дохилии Ҷумҳурии Тоҷикистон иттилоъ дода шуд, ки дар нимсолаи якуми соли равон дар кишвар 604 ҳолати машғул шудан ба ҷодугарӣ ва фолбинӣ ошкор карда шуд.

Афзуда шуд, ки дар шашмоҳаи соли равон машғул шудан ба ҷодугарӣ ва фолбинӣ афзудааст. Имсол нисбат ба ҳамин давраи соли гузашта 109 ҳолат зиёд ба қайд гирифта шудааст.

Дар ин росто, вазири корҳои дохилии кишвар Раҳимзода Рамазон иброз дошт, ки рӯзноманигорон низ бояд корҳои фаҳмондадиҳиро тавассути матолибашон зиёдтар кунанд, зеро мубориза бо ҷодугарону фолбинон танҳо вазифаи мақомоти ҳифзи ҳуқуқ нест.

Ёдовар мешавем, ки дар Ҷумҳурии Тоҷикистон барои машғул шудан ба ҷодугарӣ ва фолбинӣ ҷавобгарӣ пешбинӣ карда шудааст. Маротибаи якум ҷарима ё то 15 шабонарӯз ҳасби маъмурӣ ва маротибаи дуюм ё вазнинтар эътироф шудани амалу кирдор парвандаи ҷиноятӣ оғоз шуда, ҷарима ба маблағи аз 112 ҳазору 500 то 150 000 сомонӣ ё маҳрумият аз озодӣ ба муҳлати аз 1 то 2 сол пешбинӣ шудааст.

Dialog.tj