Чак Шумер, раҳбари ақаллияти демократҳои Сенати Амрико, бо ишора ба афзоиши талафоти низомиёни амрикоӣ дар ҷараёни ҷанг бо Эрон, аз Доналд Трамп, раиси ҷумҳури кишвараш хостааст, ки ба ин даргирӣ поён диҳад.

Ба гузориши хабаргузориҳои Амрико Чак Шумер рӯзи сешанбе, 21-уми июл, дар саҳифаи худ дар шабакаи иҷтимоии “Х” чунин навишта аст: “Ҳар сонияе, ки Доналд Трамп ҷанги худро алайҳи Эрон тӯлонитар мекунад, неруҳои мо як сонияи дигар дар маърази хатар боқӣ мемонанд”.

Ӯ афзуда, ки демократҳо дар Сенат ҷумҳурихоҳонро водор хоҳанд кард, то бори дигар барои поён додан ба ҷанг ва бозгардондани неруҳои амрикоӣ ба кишвар раъй диҳанд.

Чак Шумер дар поёни паёми худ таъкид кардааст: “Дигар бас аст: ба ин ҷанг поён диҳед”.

Ин сенатори амрикоӣ пештар низ пас аз азсаргирии даргириҳои низомӣ миёни Амрико ва Эрон аз Кохи Сафед хоста буд, ки ҷангро хотима диҳад. Ӯ гуфта буд, ки тавофуқи миёни Вашингтон ва Теҳрон хеле зуд аз ҳам пошид ва Конгресс барои хориҷ кардани неруҳои амрикоӣ аз минтақаи даргирӣ ва поён додан ба ҷанг раъй додааст.

Ин изҳорот дар ҳоле матраҳ мешавад, ки танишҳо миёни Амрико ва Эрон дар ҳафтаҳои охир афзоиш ёфта, ҳамлаҳои мутақобили ду тараф ба пойгоҳҳои низомӣ ва мавзеъҳои якдигар идома дорад.

То кунун Кохи Сафед ба ин изҳороти Чак Шумер вокуниши расмӣ нишон надодааст.

Dialog.tj