Маркази матбуоти Бонки миллии Тоҷикистон навиштааст, ки дар шабакаҳои иҷтимоӣ ва паёмрасонҳо эълонҳои бардурӯғ оид ба мусоидат дар гирифтани қарзҳои имтиёзнок паҳн гардида истодаанд.

Манбаъ афзудааст, ки барои фиреб додани шаҳрвандон қаллобон аз ҳуҷҷатҳои қалбакӣ, логотип ва унсурҳои сохтаи расмӣ, фикру мулоҳизаҳои бардурӯғ ва ботҳои сохта истифода мебаранд.

Дар ин росто, Бонки миллии Тоҷикистон ҳушдор медиҳад, ки ба чунин эълонҳо ва паёмакҳо бовар накунанд, ба шахсони ношинос ҳеҷ гоҳ маблағ интиқол надиҳанд ва маълумотро танҳо аз манбаъҳои расмӣ дастрас намоянд.

Дар иттилоия омадааст, ки Бонки миллии Тоҷикистон ба шахсони воқеӣ хизматрасонии бонкӣ анҷом намедиҳад, ба аҳолӣ қарз намедиҳад, барои интиқоли маблағ аз шаҳрвандон дархост намекунад ва тавассути паёмрасонҳо ҳуҷҷатҳои расмӣ ё шаҳодатномаи кормандонро ирсол намекунад.

Dialog.tj