Сипоҳи посдорони Инқилоби Исломии Эрон эълом кард, ки неруи дарёии ин ниҳод як маркази иттилоотӣ ва як истгоҳи пуштибонии неруҳои Амрикоро дар Кувайт ва Баҳрайн ҳадаф қарор додааст.

Сипоҳ рӯзи шанбе, 18-уми июл дар иттилоияи шумораи 28-и худ, ки дар хабаргузории “Тасним” нашр шудааст, таъкид мекунад, ки истгоҳи пуштибонии сӯхти новгони Амрико, таваққуфгоҳи ҳавопаймоҳои ҷангии ин кишвар, як маркази иттилоърасонӣ ва як маркази сигналӣ ва мухобиротии Амрико дар ҷараёни ҳамлаҳои паҳподӣ ва мушакӣ мавриди ҳамла қарор гирифтаанд.

Бар асоси ин иттилоия, истгоҳи пуштибонии сӯхти новгони Амрико дар бандари Ал-Аҳмадии Кувайт ва таваққуфгоҳи ҳавопаймоҳои ҷангӣ дар минтақаи Шайх Исо дар Баҳрайн ҳадафи ҳамла қарор гирифтаанд.

Сипоҳ ҳамчунин, таъкид кардааст, ки маркази иттилоърасонии Амрико дар Баҳрайн, ки аз он бо номи “Бателко” ёд шудааст ва як маркази сигналӣ ва мухобиротии Амрико дар Кувайт низ тахриб шудаанд.

То кунун мақомоти Амрико, Кувайт ва Баҳрайн дар бораи ин изҳороти Сипоҳи посдорони Инқилоби Исломии Эрон вокуниши расмӣ нишон надодаанд ва  дар таъйиди он хабар мунташир нашудааст.

Dialog.tj