Кремл иддаои Доналд Трамп, раиси ҷумҳури Амрико, дар бораи талоши Русия барои таъсиргузорӣ ба интихоботи ин кишварро қотеъона рад карда, таъкид намуд, ки Маскав ҳаргиз дар умури дохилии кишварҳои дигар мудохила накардааст.

Ба гузориши хабаргузории ТАСС, Дмитрий Песков, сухангӯи Кремл, рӯзи ҷумъа, 17-уми июл дар посух ба суоли хабарнигорон гуфт: “Мо ҳамаи ин иттиҳомҳоро қотеъона рад мекунем. Русия ҳеч гоҳ дар умури дохилии дигарон дахолат накардааст ва интизор дорад, ки ҳеч кишваре низ барои дахолат ба умури дохилии мо талош накунад”.

Ӯ афзуд, ки Доналд Трамп дар муаррифии Русия ҳамчун “таҳдид” барои интихоботи Амрико ба манобеи иттилоотии беном ва беасос истинод мекунад.

Песков ҳамчунин, ёдовар шуд, ки пештар дар Амрико чандин таҳқиқот ва баррасӣ дар бораи ин масъала анҷом шуда буд ва ҳамаи онҳо ба натиҷаи яксон расидаанд, ки Русия ҳеч гуна нуфуз ё мудохилае дар интихоботи Амрико надоштааст.

Ба гуфтаи ӯ, ин натиҷагириҳо аз ҷониби ниҳодҳои амниятӣ ва иттилоотии Русия пешниҳод нашуда, балки комиссияҳои порлумонӣ ва Дафтари додситони кулли Амрико низ ба ҳамин хулоса расида буданд.

Ин изҳорот пас аз он садо дод, ки Доналд Трамп шаби панҷшанбе ба вақти шарқии Амрико иддао кард, арзёбиҳои иттилоотӣ нишон медиҳанд, ки душманони Амрико, аз ҷумла Русия, Чин, Эрон, Кореяи Шимолӣ ва бархе гурӯҳҳои ғайридавлатӣ, тавони нуфуз ба сохтори интихоботии Амрикоро доранд.

Пеш аз ин низ Лин Сзян, сухангӯи Вазорати корҳои хориҷии Чин, иддаои Трамп дар бораи мудохилаи Пекин дар интихоботи Амрикоро рад карда, онро “комилан сохта ва як туҳмати ғаразнок” хонда буд. Ба гуфтаи ӯ, Чин ба асли дахолат накардан ба умури дохилии дигар кишварҳо пойбанд аст ва ҳаргиз дар интихоботи Амрико мудохила накардааст.

Dialog.tj