Сухангӯи Вазорати корҳои хориҷии Чин иддаои Доналд Трамп дар бораи дахолати Пекин дар интихоботи Амрикоро рад карда, онро “комилан сохта ва як туҳмати ғаразнок” хондааст.

Ба гузориши “Глобал Таймз” (Global Times), Лин Сзян рӯзи ҷумъа дар як нишасти хабарӣ гуфтааст, ки Чин ҳамеша ба асли дахолат накардан ба умури дохилии дигар кишварҳо пойбанд буда, ҳеч таваҷҷуҳе ба интихоботи Амрико надорад ва ҳаргиз дар он мудохила накардааст.

Ӯ афзудааст, ки ҷомеаи байналмилалӣ хуб медонад кадом кишвар ба таври маъмул дар умури дохилии дигар давлатҳо мудохила мекунад, солҳои тӯлонӣ ҳукуматҳо, ширкатҳо ва шаҳрвандони одиро дар саросари ҷаҳон зери назорат қарор медиҳад ва маълумоти шаҳрвандони хориҷиро дар миқёси густурда ҷамъоварӣ мекунад.

Лин Сзян аз Амрико хостааст, ки дар рафтори худ бознигарӣ кунад, туҳматҳои беасос алайҳи Чинро поён диҳад ва аз истифодаи Чин ҳамчун мавзуи муборизаҳои интихоботии дохилии худ худдорӣ намояд.

Ин изҳорот пас аз он садо дод, ки Доналд Трамп дар як суханронии телевизионӣ иддао кард, Чин ба таври ғайриқонунӣ ба маълумоти 220 миллион парвандаи раъйдиҳандагони амрикоӣ, аз ҷумла номҳо, маълумоти тамос, гароишҳои ҳизбӣ ва дигар маълумоти ҳассос дастрасӣ пайдо кардааст.

Раиси ҷумҳури Амрико ин ҳодисаро “амали бесобиқа барои амнияти интихобот” тавсиф карда, иддао намуд, ки Чин кӯшидааст давлати нахустини ӯ ва корзори интихоботии соли 2020-ро заиф созад. Ба гуфтаи Трамп, Пекин ҳамчунин, барои таъсиргузорӣ ба интихоботи миёндавраии соли 2018, ки дар он демократҳо назорати Маҷлиси намояндагонро ба даст оварданд, иқдом кардааст.

Трамп, инчунин, Чинро муттаҳам кардааст, ки аз иртиботи худ бо ширкатҳои амрикоӣ истифода бурда, онҳоро “алайҳи ӯ” қарор дода ва барои ташвиқи рӯзноманигорони амрикоӣ ба нашри матолиби манфӣ дар бораи ӯ талош кардааст.

Ин изҳорот ду моҳ пас аз сафари Трамп ба Чин ва дидораш бо Сӣ Ҷинпин, раиси ҷумҳури ин кишвар, матраҳ мешавад.

Dialog.tj