Сайид Аббос Ироқчӣ, вазири корҳои хориҷии Эрон, таъкид кардааст, ки нуфузи Исроил дар сохтори қудрати Амрико ба зудӣ фош хоҳад шуд.

Ба гузориши хабаргузории “Тасним”, Ироқчӣ бо ишора ба ончи “умқи нуфузи режими саҳюнистӣ дар сохтори қудрати Амрико” хондааст, гуфтааст, ки натиҷаи ин нуфуз ба зудӣ ошкор хоҳад шуд.

Вазири корҳои хориҷии Эрон афзудааст, ки ба амрикоиҳо пайваста дар бораи “нуфузи хориҷӣ” ҳушдор дода мешавад.

Ӯ ҳамчунин, гуфтааст, ки Исроил бо роҳандозии як корзор талош дорад давлати Амрикоро фиреб дода, онро ба ҷанги интихобие бикашонад, ки ба гуфтаи ӯ, “бефарҷом” хоҳад буд ва пирӯзие дар пай нахоҳад дошт.

Ироқчӣ ҳамчунин, Исроилро муттаҳам кардааст, ки аз пули андозсупорандагони амрикоӣ барои хомӯш кардани ҳар гуна садои интиқод дар дохили Иёлоти Муттаҳида истифода мекунад.

Ӯ дар поёни изҳороти худ таъкид кардааст: “Ҳамаи инҳо ба зудӣ бармало хоҳанд шуд”.

Dialog.tj