Сипоҳи посдорони Инқилоби Исломии Эрон эълом кардааст, ки чанд фарванд ҳавопаймои сӯхтрасон ва ҷангандаи амрикоӣ бо мушакҳои баллистикӣ ва чандин паҳпод ҳадаф қарор гирифта ва нобуд шудаанд.

Ба гузориши хабаргузории “Тасним”, равобити умумии Сипоҳи посдорони Инқилоби Исломӣ дар баёнияи шумораи 22-и худ таъкид кардааст, ки дар мавҷи 14-уми амалиёти “Насри 2” ҷангандаҳо ва ҳавопаймоҳои сӯхтрасони амрикоии мустақар дар Урдун дар ду марҳила бо чандин мушаки баллистикӣ ва паҳпод мавриди ҳамла қарор гирифтаанд.

Дар ин баёния омадааст, ки ин ҳамлаҳо боиси нобуд шудани чанд ҳавопаймои сӯхтрасон ва ҷангадаи амрикоӣ ва расонидани осеби ҷиддӣ ба теъдоди бештари онҳо шудааст.

Сипоҳ дар баёнияи худ навиштааст, ки артиши Амрико аз пойгоҳҳои худ дар Урдун барои ҳамла ба аҳдофи ғайринизомӣ, аз ҷумла чанд пул, маҳалҳои истиқоматӣ ва як маркази обрасонӣ дар Бандар Аббос, дар ҷануби Эрон истифода кардааст.

Дар идомаи баёния Сипоҳ аз мардуми Урдун ва артиши ин кишвар хостааст алайҳи манофеи Амрико иқдом кунанд ва ончи онро “ҳузури амрикоиҳо дар Урдун” номидааст, аз ин кишвар дур созанд.

Сипоҳи Эрон ҳамчунин, таъкид кардааст, ки пас аз ҳамлаи соли гузашта ба пойгоҳи “Ал-Удайда”-и Қатар, фармондеҳии марказии неруҳои Амрико дар минтақа (СЕНТКОМ) аз Қатар ба пойгоҳи “Ал-Азрақ” дар хоки Урдун интиқол дода шудааст.

Dialog.tj