Сипоҳи посдорони Инқилоби Исломии Эрон эълом кард, ки дар мавҷи 8-уми амалиёти “Наср 2” як пойгоҳи низомии Иёлоти Муттаҳида дар Кувайт ва маҳалли будубоши сарбозони амрикоиро ҳадафи ҳамлаҳои мушакӣ ва паҳподӣ қарор додааст.

Ба гузориши хабаргузории Тасним, равобити умумии Сипоҳ дар иттилоияи шумораи 15 гуфтааст, ки радари пешогоҳии сомонаи дифои ҳавоии “C-RAM” дар пойгоҳи “Алӣ ас-Солим” ва ҳамчунин, маҳалли будубоши сарбозони амрикоӣ дар Кувайт дар як ҳамлаи таркибӣ мавриди ҳадаф қарор гирифтаанд.

Дар ин иттилоия омадааст, ки ин амалиёт дар посух ба ҳамлаҳои шаби гузашта ба бархе аз соҳилҳо ва шаҳрҳои ҷанубии Эрон анҷом шудааст. Ба гуфтаи Сипоҳ, неруҳои дарёӣ ва ҳавофазои он бо истифода аз мушакҳо ва паҳподҳо ин аҳдофро “дарҳам кӯбидаанд”.

Сипоҳ ҳамчунин, аз мақомоти Кувайт ва мардуми ин кишвар хостааст, ки нагузоранд аз хоки Кувайт барои анҷоми ҳамлаҳо алайҳи Эрон истифода шавад. Дар иттилоия аз шаҳрвандони Кувайт даъват шудааст, ки кишвари худро аз ҳузури неруҳои хориҷӣ “пок” кунанд.

То кунун Иёлоти Муттаҳида ва мақомоти Кувайт дар бораи ин ҳамла изҳори назар накардаанд ва ҷузъиёти мустақиле дар бораи мизони хисорот ё талафоти эҳтимолӣ мунташир нашудааст.

Dialog.tj