Муҳаммадбоқир Қолибоф, раиси Маҷлиси Эрон, мегӯяд, Теҳрон барои расидан ба ҳадафҳои худ бояд миёни музокира ва омодагии низомӣ тавозун барқарор кунад ва дар канори истифода аз абзорҳои дипломатӣ, барои муқобила бо таҳдидҳо низ омода бошад.

Расонаҳои Эрон рӯзи чоршанбе, 15-уми июл, гузориш додааст, ки Қолибоф гуфтааст, Эрон “ҳеч гоҳ хостори ҷанг набуда ва акнун низ нест”, аммо бояд ҳамвора барои набард омода бошад ва барои ҳифозат аз амният ва манофеи миллии худ истодагӣ кунад.

Қолибоф таъкид кардааст, ки музокира дар шароити кунунӣ ба маънои созиш нест, балки дар канори ҷанг, бахше аз роҳбурди муқовимат ва муҳофизат аз манофеи миллии Эрон ба шумор меравад.

Ӯ ҳамчунин, гуфтааст, ки амнияти миллии ин кишвар бо “ҳифзи тартиботи Эрон дар тангаи Ҳурмуз” иртибот дорад ва неруҳои мусаллаҳи Эрон барои муқобилият бо он чи таҷовузи душман хонда, озодии амали комил доранд.

Ин изҳорот дар ҳоле матраҳ мешавад, ки танишҳо миёни Эрон ва Иёлоти Муттаҳида бар сари барномаи ҳастаӣ, таҳримҳо ва вазъияти амниятии минтақа афзоиш ёфтааст.

Dialog.tj