Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон (“Тоҷикстандарт”) хабар додааст, ки дар давраи ҳисоботӣ дар кишвар 1 миллиону 164 ҳазору 596 килограмм маҳсулоти гуногуни пастсифат ба қайд гирифта шудааст.

Дар нишасти матбуотии ин ниҳод гуфта шуд, ки дар озмоишгоҳҳои ташхиси маҳсулоти хӯрокворӣ аз рӯйи сифат ва бехатарӣ 3590 килограмм маҳсулоти гӯштӣ, 54 ҳазору 522 килограмм равғани растанӣ, 91 ҳазору 500 килограмм орд, 13 ҳазору 596 килограмм маҳсулоти ғалладонагӣ, 30 ҳазору 861 килограмм консерва, 1306 литр нӯшокиҳои спиртӣ, 13 ҳазору 480 литр нӯшокиҳои ғайриспиртӣ, 4943 килограмм маҳсулоти қаннодӣ, 55 ҳазору 786 килограмм намак ва дигар маҳсулот ғайристандартӣ арзёбӣ шудаанд.

Масъулони Агентӣ ҳамчунин, иттилоъ доданд, ки дар шаш моҳи сипаришуда соҳибкорон 619 ҳазору 409 килограмм маҳсулоти гуногуни хӯроквории муҳлати истифодаашон гузаштаро ба анборҳои нигоҳдории Агентӣ супурдаанд.

Дар идома зикр гардид, ки аз аввали соли равон дар маҷмӯъ 121 ҳазору 460,2 тонна маҳсулот аз ташхиси сертификатсионӣ гузаронида шудааст.

Dialog.tj