Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон аз баландшавии ҳарорати ҳаво ва сар задани селҳои хусусияти пиряхидошта ҳушдор дод.

Манбаъ дар сомонаи расмии худ навиштааст, ки аз 15-ум то 18-уми июл дар ҷумҳурӣ баландшавии ҳарорати ҳаво пешгӯӣ шуда, ҳарорати рӯзона дар ноҳияҳои водибуда то 41+46° гарм, дар ноҳияҳои доманакӯҳию кӯҳӣ то 33+38° гарм ва дар ноҳияи Дарвози ВМКБ то 39+41° гарм мешавад.

Афзуда мешавад, ки бо сабаби баландшавии ҳарорати ҳаво дар ноҳияҳои доманакӯҳию кӯҳии тобеъи ҷумҳурӣ, вилояти Суғд ва ноҳияҳои ғарбии Вилояти Мухтори Кӯҳистони Бадахшон хавфи сар задани селҳои хусусияти пиряхидошта пешгӯӣ мегардад.

Ҳамчунин, гуфта мешавад, ки дар робита ба баланд шудани ҳарорати ҳаво, дар ҳавзаҳои дарёҳои Панҷ, Зарафшон ва Вахш баландшавии сатҳи об дар назар аст.

Dialog.tj