Тибқи иттилои Солеҳа Холмаҳмадзода, вазири меҳнат, муҳоҷират ва шуғли аҳолии Ҷумҳурии Тоҷикистон давоми нимсолаи якуми соли ҷорӣ дар кишвар 61 ҳазору 125 нафар ба омӯзиши касбҳои гуногун фаро гирифта шуданд.

Зимни нишасти матбуотии Вазорати меҳнат, муҳоҷират ва шуғли аҳолии Ҷумҳурии Тоҷикистон афзуда шуд, ки танҳо дар шаш маркази рушди малакаҳо, касбомӯзӣ ва хизматрасонӣ 12 ҳазору 222 нафар соҳиби касб гардида, соҳиби сертификати дорои стандарти байналмилалӣ шуданд.

Гуфта шуд, ки дар марказҳои касбомӯзӣ ба шаҳрвандон касбҳои роҳбалад, таъмиргари асбобҳои рӯзгор, пешхизмат, маъмури меҳмонхона, тарабхона, кафшергари газию барқӣ, таъмиргари техникаи кишоварзӣ, заргар, ошпаз, қаннод, андовачӣ, челонгари таҷҳизоти санитарию техникӣ ва мутахассис оид ба истифода ва хизматрасонии лифт омӯзонида мешаванд.

Иттилоъ дода шуд, ки ҳоло 52 маркази рушди ҳунармандӣ ва малакаҳои касбии муосир фаъолият дошта, дар онҳо шаҳрвандон аз рӯйи касбҳои мутобиқ ба талаботи бозори меҳнат ба омӯзиш фаро гирифта мешаванд.

Dialog.tj