Манобеи маҳаллӣ ба расонаҳои Афғонистон гуфтаанд, ки даҳҳо ҷангҷӯи мусаллаҳи гурӯҳи террористии Толибон аз Кӯфоб вориди ноҳияи Шакии Бадахшони Афғонистон шуда ва дар маркази ин ноҳия ҷойгир шудаанд.

Манобеи маҳаллӣ рӯзи шанбе, 4-уми июл дар суҳбат бо рӯзномаи “8-и субҳ” гуфтаанд, ки пас аз ворид шудани неруҳо ба минтақа, дар бархе аз сохторҳои амниятии Толибон дар Шакӣ ва Нусай тағйирот ворид шудааст.

Ба гуфтаи манобеъ, дар ин раванд мудири нави амнияти Толибон дар Кӯфоб муаррифӣ шуда ва шуморе аз масъулони маҳаллии ин гурӯҳ аз вазифаҳои худ барканор шудаанд.

Гуфта мешавад, ки дар бархе минтақаҳо, аз ҷумла Кӯфоб, Шакӣ ва Нусай, мудирони истихбороти Толибон барканор шуда ва афроди нав ба ҷойи онҳо таъин шудаанд.

Манобеъ ҳамчунин, гуфтаанд, ки нафаре ба номи Мӯсо Кока, ки пештар дар зиндони Кундуз будааст, аз ҷониби Толибон бурда шудааст, то афроди вобаста ба ӯро ҷамъоварӣ ва халъи силоҳ кунанд.

Дар идома омадааст, ки дар Шакӣ нафаре ба номи Мулло Абдулғанӣ низ мусаллаҳ карда шуда ва барои муқобилият бо афроди вобаста ба Ҷумъахон Фотеҳ фиристода шудааст, то дар раванди боздошт ва даъвати гурӯҳи онҳо ҳамкорӣ кунад.

Ин иқдомҳо дар ҳоле анҷом мешаванд, ки танишҳо дар Бадахшони Афғонистон афзоиш ёфта ва вазъи амниятӣ дар бархе минтақаҳои ин вилоят нигаронкунанда тавсиф мешавад.

Dialog.tj