Тибқи иттилои маркази матбуоти Вазорати фарҳанги Ҷумҳурии Тоҷикистон, дар кишвар барномаи овозадори "Выжить В Таджикистане" таҳия мегардад.

Манбаъ навиштааст, ки имрӯз, 30-юми июн вохӯрии вазири фарҳанги Ҷумҳурии Тоҷикистон Матлубахон Сатториён бо ҳайати намояндагони “Газпром-Медиа Холдинг” аз Федератсияи Русия сурат гирифт.

“Бо мақсади муаррифии табиати нодиру дороиҳои фарҳангии Тоҷикистон, муҳити орому осоишта, имкониятҳои бузурги сайёҳӣ ва истироҳатӣ, инфрасохтори пешрафтаю замонавӣ лоиҳаи телевизионии байналмилалии “Выжить В Таджикистане” роҳандозӣ карда мешавад”, - навиштааст маркази матбуоти Вазорати фарҳанги Ҷумҳурии Тоҷикистон.

Бояд гуфт, ки барномаи “Выжить В...” тариқи шабакаи ТНТ пахш мешавад. То ҳол барномаи мазкур дар Самарқанд, Дубай ва Стамбул таҳияву пешниҳод гардидааст.

Дар барномаи мазкур ду тим, ки яке намояндагони шоу-бизнес ва дигаре намояндагони мардуми одӣ ҳастанд, барои ба даст овардани даҳ миллион рубли русӣ мубориза мебаранд.

Тазаккур бояд дод, ки метавон ба воситаи барномаи мазкур маконҳои таърихӣ ва сайёҳии кишварамонро ба оламиён нишон дод.

Dialog.tj