Расонаҳои Афғонистон дар такя ба манобеъи маҳаллии худ аз Бадахшони ин кишвар мегӯянд, ки дар пайи бенатиҷа мондани гуфтугӯҳои Комиссияи вижаи гурӯҳи террористии Толибон бо Ҷумъахон Фотеҳ, фармондеҳи норозии ин гурӯҳ, Мулло Яъқуб Муҷоҳид, вазири дифои Толибон ба Бадахшон рафтааст.

Манобеъи маҳаллӣ рӯзи панҷшанбе, ба рӯзномаи “8 –и субҳ”-и Афғонистон гуфтаанд, ки Мулло Яъқуб Муҷоҳид субҳи имрӯз ба Бадахшон сафар карда ва бо беш аз 40 адад мошини низомӣ ба ноҳияи (вулусволии) Ҷурм рафтааст.

Манобеъ гуфтаанд, ки Толибон ҳадафи сафари Мулло Яъқуб Муҷоҳидро ба Бадахшон баррасии вазъияти амниятии марзҳои Вахон, Ишкошим ва Шуғнон гуфтаанд, аммо ӯ эҳтимолан имконот ва зарфиятҳои низомиро барои ҷанг бо Ҷумъахон Фотеҳ баррасӣ мекунад.

Манобеъ гуфтаанд, ки пештар комиссияи вижаи Толибон ба Ҷумъахон Фотеҳ 15 рӯз муҳлат дода буд, то тасмими ниҳоии худро бигирад.

Манобеъ ҳамчунин, гуфтаанд, ки шоми рӯзи гузашта Қорӣ Фасиҳуддин Фитрат, раиси ситоди артиши Толибон, бо чархбол ба ноҳияи Нусай рафта ва ду пешниҳоди фармондеҳии Толибонро дар Бадахшон ба Ҷумъахон Фотеҳ ироа кардааст.

Ба гуфтаи манобеъ, Ҷумъахон Фотеҳ бо радди пешниҳодҳои Фасиҳуддин Фитрат ҳушдор додааст, ки агар барои ҳазфи ӯ лашкаркашӣ шавад, аз худ дифоъ хоҳад кард.

Dialog.tj