Исмоил Бақоӣ, сухангӯи Вазорати корҳои хориҷаи Эрон, кишварҳои узви НАТО-ро ба иштирок дар ҳамлаҳо алайҳи Эрон муттаҳам карда ва хостори посухгӯии онҳо шудааст.

Бақоӣ шаби чоршанбе, 24-уми июн дар “Х” навиштааст, ки он чи аз сӯйи мақомоти НАТО матраҳ шудааст, “эътирофи ошкор” ба ҳамдастии ин эътилофи низомӣ дар ҷанги ғайриқонунӣ алайҳи Эрон аст.

Ӯ афзудааст, НАТО ва кишварҳои узви он, ки дар тасмимгириҳо ва иқдомҳои марбут ба ин ҳамлаҳо нақш доштаанд, бояд дар баробари тамоми паёмадҳои он посухгӯ бошанд.

Сухангӯи Вазорати корҳои хориҷаи Эрон ҳамчунин, муддаӣ шудааст, ки Италия ва Руминия аз сӯйи дабири кулли НАТО ба ҳайси кишварҳои иштироккунанда дар ҳамлаҳо алайҳи Эрон муаррифӣ шудаанд.

Бақоӣ гуфтааст, ки ин кишварҳо ҳамроҳ бо соири давлатҳои аврупоӣ, ки ба гуфтаи ӯ дар ҳамлаҳои Амрико ва Исроил алайҳи Эрон ҳамкорӣ кардаанд, бояд барои шаҳрвандони худ ва афкори умумии ҷаҳон тавзеҳ диҳанд, ки чаро дар ин иқдомҳо иштирок кардаанд.

Ӯ ҳамчунин, ҳамлаҳои ёдшударо омили талафот ва хисорот дар шуморе аз шаҳрҳои Эрон, аз ҷумла Теҳрон, Исфаҳон, Табрез, Шероз, Бандар Аббос, Ҳамадон, Санандаҷ, Ломард ва Миноб донистааст.

Dialog.tj