Ким Чин Ин, раҳбари Кореяи Шимолӣ гуфтааст, ки ин кишвар барои муқобилият бо вазъияти печида ва ғайриқобили пешбинии амнияти ҷаҳонӣ, ҷойгоҳи худро ба ҳайси як қудрати ҳастаӣ ҳифз ва тақвият хоҳад кард.

Хабаргузории давлатии Кореяи Шимолӣ (KCNA) рӯзи сешанбе, 23-уми июн, гузориш додааст, ки Ким ин изҳоротро дар нишасти Кумитаи марказии Ҳизби коргарони ҳоким матраҳ кардааст.

Ӯ Амрикоро ба ташдиди даргириҳо дар Аврупо ва Ховари Миёна муттаҳам карда ва гуфтааст, ки рақобати қудратҳои бузург сабаби афзоиши танишҳо дар ҷаҳон шудааст.

Раҳбари Кореяи Шимолӣ ҳамчунин, Амрико ва Кореяи Ҷанубиро муттаҳам кардааст, ки бо густариши ҳамкориҳои муштараки ҳастаӣ, вазъияти амниятӣ дар нимҷазираи Кореяро хатарноктар сохтаанд.

Ким таъкид кардааст, ки густариши тавоноиҳои ҳастаӣ ва тақвияти ҷойгоҳи ин кишвар ба ҳайси як давлати дорои силоҳи ҳастаӣ, беҳтарин роҳ барои муқобила бо таҳаввулоти низомӣ ва сиёсии ҷаҳон аст.

Ӯ ҳамчунин, дастури тавсеаи бештари аслиҳа ва суръат бахшидан ба сохтмони як нови стратегии муҷаҳҳаз ба мушакҳои ҳидоятшавандаро содир кардааст.

Таҳлилгарон мегӯянд, ин изҳорот нишон медиҳад, ки Пхенян ҳамчунон халъи силоҳи ҳастаиро рад мекунад ва дар пайи таҳкими ҷойгоҳи худ ба ҳайси як қудрати ҳастаӣ аст.

Dialog.tj