Рӯзномаи покистонии “Даун” бо сарзаниши иқдомҳои ҷангталабонаи Исроил дар минтақа, ба вижа алайҳи Лубнон, нисбат ба дасисаҳои Тел-Авив перомуни ёддошти тафоҳуми Исломобод ҳушдор дод ва навишт: “Амрико ва Аврупо агар ба дунболи ҳифзи тавофуқи ҳосилшуда бо Ҷумҳурии Исломии Эрон ҳастанд, бояд бо Исроил қотеъона бархӯрд кунанд”.

Рӯзномаи англисизабони “Даун” сармақолаи худро ба таҳаввулоти ҷории минтақа, ба вижа ҳамлаҳои Исроил ба Лубнон дар сояи музокироти пешбурди таъмини ёддошти тафоҳуми Исломобод ихтисос дод ва навишт: “Исроил танҳо омили харобкорие аст, ки дар садади зарба задан ба талошҳои сулҳ мебошад”.

Дар ин сармақола омадааст: “Ҷиноятҳои Исроил алайҳи ғайринизомиён дар Лубнон васфнопазир аст. Ҳазорон нафар аз мардуми бегуноҳ ҷони худро аз даст додаанд ва Нетанёҳу дар садади густаришталабии бештар дар марзҳои Лубнон аст”.

Рӯзномаи англисизабони “Даун” навишт: “Ҷомеаи байналмилалӣ, хусусан Иёлоти Муттаҳида ва Аврупо, бояд бо дӯстони худ дар Тел-Авив қотеъ бошанд ва ба онҳо бигӯянд, ки рафтори бесуботкунандаи онҳо бояд поён ёбад.

Ин нашрияи покистонӣ таъкид кард: “Дар гузашта собит шудааст, ки бузургтарин таҳдид барои сулҳи Ховари Миёна Эрон нест, балки Исроил аст, ки ба кишварҳои мустақил аз паси ҳамдигар ҳамла кардааст ва дар канори он наслкушии Ғаззаро анҷом додааст. Бояд пеш аз он, ки шанси ба душворӣ бадастомада барои сулҳро аз байн бибарад, пеши роҳи он гирифта шавад.

Дар ин сармақола афзуда шуд: “Дар ҳоле, ки тақрибан ҳамаи давлатҳои Амрико дар гузашта ва ҳамчунин, кишварҳои аврупоӣ барои хушнудии Исроил иқдом кардаанд ва рафтори ваҳшиёнаи онро нодида гирифтаанд, ин бор ба назар мерасад лаҳни Вашингтон тундтар шудааст. Барои мисол, Ҷей Ди Вэнс, муовини раиси ҷумҳури Амрико, бо ишора ба норизоятии Тел-Авив аз тавофуқи Эрон, ба Исроил гуфтааст, ки “аз хоб бедор шавад ва воқеияти авзоъро дарк кунад”.

Ин рӯзнома хитоб ба Кохи Сафед навишт: “Аммо суханони тунд кофӣ нахоҳад буд. Агар Иёлоти Муттаҳида мехоҳад Исроил рафтори нодурусти худро тағйир диҳад, пас бояд буҷа ва силоҳҳое, ки мошини ҷангии саҳюнистӣ барои идомаи кор ба он ниёз дорад, масдуд кунад. Исроил тақрибан ҳеч дӯсте дар ҷаҳон надорад ва агар Амрико оғоз ба изҳори вуҷуд кунад, Тел-Авив бояд ба суханони он гӯш диҳад”.

Рӯзномаи англисизабони “Даун” таъкид кард: “Тафоҳумномаи Исломобод муайян аст: оташбас бояд дар ҳамаи ҷабҳаҳо, аз ҷумла Лубнон, иҷро шавад. Дар ғайри ин сурат ё Исроил бояд тӯфангҳои худро хомӯш карда ва аз тамоми Лубнон ақибнишинӣ кунад ё ин, ки то замоне, ки рафтори худро ислоҳ накунад, танҳо монада ва бо таҳрим аз ҷониби ҷомеаи байналмилалӣ рӯбарӯ шавад”.

Ба гузориши расонаҳои Эрон вазири корҳои хориҷаи Ҷумҳурии Исломии Эрон бомдоди душанбе дар шабакаи “Икс” натиҷаҳои музокироти Швейтсария бо миёнҷигарии Покистон ва Қатарро шарҳ дод.

Сайид Аббос Ироқчӣ дар шабакаи иҷтимоии “Икс” навишт: “Ин миёнҷигарии хастагинопазири Покистон ва Қатар боиси пешрафтҳои бузург барои поён додан ба ҷанг дар Лубнон шуд. Ҳамчунин, таҳрими содироти нафт ва петрохимия боздошта шуд, муҳосираи дарёӣ бардошта шуд, бархе аз дороиҳои масдудшуда озод шуданд ва тарҳи бузурги бозсозӣ ва рушди иқтисодии Эрон ба иҷро даромад”.

Dialog.tj