Бо ташаббуси Китобхонаи миллии Тоҷикистон дар кишвар Озмуни ҷумҳуриявии «Беҳтарин китобхон» баргузор мешавад.

Тавре ки АМИТ «Ховар» бо такя ба маълумоти Китобхонаи миллии Тоҷикистон хабар медиҳад, Озмуни ҷумҳуриявии «Беҳтарин китобхон» бо мақсади баланд бардоштани завқи китобхонӣ, ҷалби аҳолӣ ба китобхона, ташаккули фарҳанги мутолиаи китоб, арҷ гузоштан ба муқаддасоти миллию фарҳангӣ доир мегардад.

“Дар озмун аъзои фаъоли Китобхонаи миллии Тоҷикистон, хонадагони муассисаҳои таҳсилоти миёнаи умумӣ, донишҷӯёни муассисаҳои олии касбӣ, магистранҳо, аспирантҳо, докторантҳо, омӯзгорони ҳамаи зинаҳои таҳсилот, ходимони илмию адабии муассисҳои илмиву эҷодӣ, фарҳангу санъат, калонсолон, намояндагони касбу кори гуногун ва дигар табақаҳои аҳолӣ иштирок карда метавонанд”, - навиштааст манбаъ.

Афзуда мешавад, ки иштирокчиён ба ду гурӯҳ хонандагони то 18-сола ва хонандагони аз 18-сола боло тақсим карда мешаванд.

Иттилоъ дода мешавад, ки қабули ҳуҷҷатҳо барои иштирок ба озмуни мазкур аз 10-ум то 25-уми июл муайян гардидааст. Ғолибони озмун то 14-уми август муайян шуда, 4-уми сенябр дар Рӯзи китоб қадрдонӣ мегарданд.

Dialog.tj