Ҳокан Фидан, вазири корҳои хориҷаи Туркия, дар ҷараёни сафари расмӣ ба Русия бо Владимир Путин, раисҷумҳури ин кишвар, дар шаҳри Қазон дидор кардааст.

Дар ин дидор, ки рӯзи чоршанбе, 17-уми июн, бо ҳузури Сергей Лавров, вазири корҳои хориҷаи Русия, ва Юрий Ушаков, ёрдамчии президенти Федератсияи Русия баргузор шудааст, Путин гуфтааст, ки равобити миёни Маскав ва Анқара ба гунаи “пайваста дар ҳоли тавсеа” аст.

Раисҷумҳури Русия афзудааст, ки равобити ду кишвар дигар сирфан расмӣ нест, балки ба сатҳи “равобити дӯстона ва дар ҳоли густариш” расидааст.

Путин ҳамчунин, гуфтааст, ки ин раванд то ҳадди зиёде ба мавзеъгирии Раҷаб Тайиб Эрдуғон, раисҷумҳури Туркия вобаста аст ва аз Ҳокан Фидан хостааст паёмҳои ӯро ба Эрдуғон интиқол диҳад.

Дар муқобил, вазири корҳои хориҷаи Туркия низ паёмҳои Раҷаб Тайиб Эрдуғонро ба Путин интиқол дода ва гуфтааст, ки мавзуъҳои муҳим дар дастури кори ду кишвар қарор доранд ва таҷрибаи Русия дар масоили минтақавӣ ва байналмилалӣ аҳамият дорад.

Dialog.tj