Аҳтам Назаров, капитани тими миллии Тоҷикистон дар вохӯрии дӯстона муқобили мунтахаби Ҳиндустон (1:1) ба майдон баромад ва ин бозии 100-уми ӯ дар ҳайати мунтахаби кишвар буд.

Ба муносибати ин рӯйдоди таърихӣ аз номи роҳбарияти Федератсияи футболи Тоҷикистон ба Аҳтам Назаров, капитани тими миллии Тоҷикистон автомобил тақдим карда шуд.

“Аз самими қалб ба роҳбарияти Федератсияи футболи Тоҷикистон барои чунин туҳфаи арзишманд ва хотирмон миннатдории худро баён мекунам. Эҳсоси дастгирӣ ва эҳтиром барои ман бисёр хушоянд аст. Ин на танҳо барои ман мояи хушҳолӣ, балки барои ҳамаи бозигарон ангезаи бузургест, то боз ҳам бештар заҳмат кашида, ба дастовардҳои нав ноил гарданд”, - навиштааст маркази матбуоти Федератсияи футболи Тоҷикистон аз қавли Аҳтам Назаров.

Ҳамчунин, капитани тими миллии Тоҷикистон иброз доштааст, ки барояш Тоҷикистонро дар арсаи байналмилалӣ намояндагӣ кардан ва узви мунтахаби миллӣ будан ифтихори бузург аст.

Dialog.tj