Арабистони Саудӣ бо маҳкум кардани ҳамлаҳои Эрон бар Урдун, Кувайт ва Баҳрайн, хоҳони коҳиши танишҳо дар минтақа шудааст.

Шабакаи “Ал-Ҷазира”, рӯзи панҷшанбе, 11-уми июн, гузориш дода, ки Вазорати корҳои хориҷаи Арабистони Саудӣ идомаи ҳамлаҳои Эронро ба ташдиди танишҳо дар минтақа хатарнок хондааст, аммо аз ҳамлаҳои Амрико ба хоки Эрон чизе нагуфтааст.

Бар асоси гузориш, Вазорати хориҷаи Арабистон дар замн, бар бозгашт ба талошҳои дипломатӣ барои ҳалли танишҳо таъкид кардааст.

Дар гузориш омада, ки Арабистон “хирадварзӣ бо бозгашт ба талошҳои дипломатӣ ва азсаргирии музокироти созанда”-ро бо миёнҷигарии Покистон ва Қатар мавриди таъкид қарор додааст.

Дар рӯзҳои охир танишҳо миёни Амрико ва Эрон афзоиш ёфта ва ду кишвар ба ҳамлаҳои мутақобили мушакӣ даст задаанд.

Расонаҳои эронӣ субҳи имрӯз аз ҳамлаи ҷавобии кишвари худ хабар доданд ва гуфтанд, ки неруҳои Сипоҳи посдорони ин кишвар пойгоҳҳои Амрикоро дар Кувайт, Баҳрайн ва Урдун мавриди ҳамлаи мушакӣ қарор доданд.

Dialog.tj