Фармондеҳии марказии артиши Амрико (Сентком) аз ҳамла бар дифои ҳавоӣ, истгоҳҳои контроли заминӣ ва сайтҳои радари назоратии Эрон дар наздикии тангаи Ҳурмуз хабар додааст.

Сентком, рӯзи чоршанбе, 10-уми июн, дар саҳифаи “Х” навиштааст, ки ин ҳамла дар посух ба сарнагунии чархболи AH-64 “Apache”-и артиши Амрико аз сӯйи Эрон анҷом шудааст.

Бар асоси гузориш, Сентком гуфтааст, ки неруҳои амрикоӣ бо “муҳимоти дақиқ” ба дастури Доналд Трамп, раиси ҷумҳури Амрико, нуқотеро дар Эрон ҳадаф қарор доданд.

Сентком гуфтааст: “Ин амалиёт посухи мутаносиб ба ҳамлаҳои ахир ба неруҳои амрикоӣ ва киштиҳои тиҷоратии байналмилалӣ дар ҳоли убур аз обҳои минтақаӣ буд”.

Ду рӯз пеш, чархболи  “Apache”-и неруҳои Амрико дар наздикии тангаи Ҳурмуз суқут кард, аммо сарнишинони он солим монданд.

Рӯзи гузашта, Сентком таъйид кард, ки ин чархбол аз сӯйи неруҳои эронӣ мавриди ҳамла қарор гирифта ва сарнагун шудааст.

Ҳамлаҳои мутақобили Эрон ва Амрико алайҳи мавозеъи ҳамдигар дар Халиҷи Форс дар ҳоле сурат мегирад, ки ду кишвар дар ҳоли музокира барои расидан ба як тавофуқ барои хатми ҷанг ҳастанд.

Dialog.tj