Раёсати Вазорати корҳои дохилӣ дар шаҳри Душанбе ду мардро барои наҷот додани ду зан аз худкушӣ қадрдонӣ кард.

Манбаъ навиштааст, ки 1-уми июни соли ҷорӣ Азимҷон Валиев ҳангоми қарор доштан дар соҳили дарёи Душанбе ҷавондухтареро мушоҳида намуд, ки бо қасди худкушӣ худро ба об партофта буд. Номбурда бо дарки масъулияти шаҳрвандӣ фавран ба кӯмак шитофт ва бо ҷасорату матонат тавонист ҷавондухтарро аз ғарқшавӣ ва хатари марг наҷот диҳад.

Ҳамчунин, дар ҳамон рӯз Фаридуншоҳ Ваҳобов ҷавонзанеро, ки бо мақсади худкушӣ худро ба дарёи Кофарниҳон партофта буд, бо эҳсоси баланди инсонӣ аз ғарқшавӣ наҷот дод.

Гуфта мешавад, ки Азимҷон Валиев ва Фаридуншоҳ Ваҳобов аз ҷониби роҳбарияти Раёсати ВКД дар шаҳри Душанбе дар вазъияти тантанавӣ бо Сипоснома ва мукофотпулӣ қадрдонӣ гардиданд.

“Милитсияи пойтахт ба чунин шаҳрвандони фаъолу ватандӯст, ки нисбат ба мушкилоти ҷомеа бетараф нестанд ва бо амалҳои нек дар ҳифзи ҳаёт ва амнияти шаҳрвандон саҳми арзанда мегузоранд, самимона изҳори сипос менамояд”, - афзудааст манбаъ.

Dialog.tj