Шоми гузашта дар варзишгоҳи «ТАЛКО-Арена»-и шаҳри Турсунзода бозии дӯстонаи тими миллии Тоҷикистон ва мунтахаби Ҳиндустон баргузор гардид.

Дар ин дидори дӯстона, ки барои сармураббии нави тими миллӣ Игор Ангеловский бозии аввалин ҳисобида мешуд, футболбозони тоҷик маҳорати хуб нишон дода, ба ҳисоби 3:1 ғолиб шуданд.

Дар 45 дақиқаи аввал футболбозони тоҷик аз ҳамтоёни худ чандон пешравии назаррас надоштанд. Дар ин қисм танҳо Шериддин Бобоев аз зарбаи 11-метра ҳисобро кушод. Аммо дар 45 дақиқаи дуюм бозии пурра ба фоидаи футболбозони тоҷик буд. Дар қисми мазкур Меҳрубон Каримов ва Эҳсони Панҷшанбе голҳои дуюм ва сеюми мунтахаби кишварро ба самар расонданд.

Қаблан иттилоъ дода шуда буд, ки Игор Ангеловский ба рақобатҳои дӯстона 26 бозигарро даъват намудааст, аз ҷумла 3 дарвозабон, 10 ҳимоятгар, 9 нимҳимоятгар ва 4 ҳамлагар.

Ёдовар мешавем, ки бозии дуюми дӯстонаи мунтахабҳои Тоҷикистон ва Ҳиндустон 9-ум июн баргузор мегардад.

 Dialog.TJ