Мақомоти интизомии пойтахт як сокини Душанбе бо гумони қаллобӣ дастгир карданд.

Бинобар иттилои Раёсати Вазорати корҳои дохилӣ дар шаҳри Душанбе, Раҷабов Маъруф, сокини 39-солаи шаҳри Душанбе дар содир намудани ҷинояти қаллобӣ гумонбар дониста мешавад.

Афзуда мешавад, ки дар натиҷаи санҷиши муроҷиатҳои ҷабрдидагон номбурда аз ҷониби кормандони ШВКД-2 дар ноҳияи Фирдавсӣ дастгир карда шуд.

Зикр мегардад, ки тафтишоти пешакӣ муайян намуд, ки Раҷабов М. худро ҳамчун устои мебел муаррифӣ намуда, бо ваъдаи таъмин намудани бисоти хона аз шаҳрвандон маблағҳои калонӣ пулӣ гирифтааст. Аз ҷумла, дар се ҳолат зарари ба ҷабрдидагон расонидаи ӯ 297 ҳазор сомониро ташкил медиҳад.  

Гуфта мешавад, ки нисбат ба номбурда бо моддаи 247 Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, мавриди тафтишоти пешакӣ қарор дорад.  

Dialog.TJ