Раёсати Вазорати корҳои дохилӣ дар шаҳри Душанбе хабар дод, ки зимни баргузории санҷишҳо кормандони ШВКД-1 дар ноҳияи Шоҳмансур ду ҳолати вайрон намудани реҷаи фаъолияти марказҳои хизматрасониро ошкор намуданд.

Ба навиштаи манбаъ, шаҳрванд Мирзоев Муҳаммад, ки ба ҳайси маъмур дар маркази дилхушии «ДримБар» фаъолият мекунад, талаботи реҷаи фаъолияти муқарраршударо вайрон кардааст. Дар ин баробар, шаҳрванд Салимов Сорбонҷон, маъмури маркази бозиҳои компютерӣ низ фаъолияти худро берун аз соатҳои муқарраршудаи корӣ ба роҳ мондааст.

“Номбурдагон на танҳо реҷаи фаъолияти муқарраршударо вайрон намудаанд, балки ба талаботи қонунии кормандони милитсия итоат накарда, ба қонуншиканӣ роҳ додаанд”, - афзудааст манбаъ.

Иттилоъ дода мешавад, ки вобаста ба ҳолати мазкур нисбат ба Мирзоев М. ва Салимов С. тибқи моддаи 479 КҲМ Ҷумҳурии Тоҷикистон протоколҳои маъмурӣ тартиб дода шуда, бо қарори суд ҷазо дар намуди ҳабси маъмурӣ ба муҳлати 5 шабонарӯз таъин карда шуд.

Dialog.TJ