Сайид Аббос Ироқчӣ, вазири корҳои хориҷаи Эрон, таъкид кардааст, ки оташбас миёни Эрон ва Амрико шомили оташбас дар тамоми ҷабҳаҳо, аз ҷумла Лубнон мебошад.

Ироқчӣ рӯзи душанбе, 1-уми июн, дар саҳифаи корбарии худ дар шабакаи иҷтимоии "Х" навиштааст, ки нақзи оташбас дар як ҷабҳа ба маънои нақзи он дар ҳамаи ҷабҳаҳо аст.

Вазири корҳои хориҷаи Эрон ҳушдор додааст, ки дар сурати нақзи оташбас, Иёлоти Муттаҳида ва Исроил масъул хоҳанд буд.

Вазири корҳои хориҷаи Эрон ин мавзуъро дар ҳоле матраҳ кардааст, ки Бинёмин Нетаняҳу, нахуствазири Исроил, эълом кардааст ба артиши худ дастур додааст, ки ба атрофи ҷанубии Байрут ҳамла кунад.

Рӯзи гузашта низ Эйла Вавие, сухангӯи арабизабони артиши Исроил, аз оғози як амалиёти густардаи низомӣ дар ҷануби Лубнон хабар дода буд.

Эрон ва Иёлоти Муттаҳида аз чанд ҳафта ба ин сӯ бо миёнҷигарии Покистон барои расидан ба як тавофуқ дар бораи поён додани ҷанг, бозкушоии тангаи Ҳурмуз ва парвандаи ҳастаии Эрон дар ҳоли музокира ҳастанд.

Шомил шудани Лубнон ба оташбас миёни Эрон ва Амрико яке аз мавзуъҳои мавриди ихтилоф дар музокироти ду тараф дониста мешавад.

Dialog.tj