Хадамоти зиддиинҳисории назди Ҳукумати Ҷумҳурии Тоҷикистон ҷиҳати иҷрои дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон гурӯҳи корӣ оид ба гузаронидани мониторинги бозори истеъмол ва фурӯши семент дар ҳудуди ҷумҳурӣ таъсис дод.

Манбаъ навиштааст, ки гурӯҳи корӣ ба бозорҳои шаҳри Душанбе, ноҳияҳои тобеи ҷумҳурӣ ва вилоятҳои Суғду Хатлон сафарбар гардиданд.

Гуфта мешавад, ки рафти мониторинг нишон дод, ки нархи як линча семент дар шаҳру ноҳияҳо тобеи ҷумҳурӣ аз 54 то 65 сомонӣ, дар шаҳри Душанбе аз 54 то 60 сомонӣ, дар вилояти Суғд аз 60 то 65 сомонӣ ва дар вилояти Хатлон аз 54 то 63 сомонӣ ба фурӯш гузошта шудааст.

Маркази матбуоти Хадамоти зиддиинҳисории назди Ҳукумати Ҷумҳурии Тоҷикистон иттилоъ медиҳад, ки аз нимаи дуюми моҳи майи соли ҷорӣ камчинии маҳсулоти семент дар бозорҳои ҷумҳурӣ мушоҳида гардида, нархи он аз 70 то 85 сомонӣ буд. Дар ин росто, дар асоси дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон ва тадбирҳои андешидашудаи кормандони Хадамоти зиддиинҳисории назди Ҳукумати Ҷумҳурии Тоҷикистон ва корхонаҳои истеҳсоли семент вазъияти бамиёномада дар як шабонарӯз ба эътидол омад.

Diaog.tj