Дар арафаи рӯзҳои хатми муассисаҳои таълимӣ, яъне занги камолот Раёсати ВКД дар шаҳри Душанбе аз падару модарон хост, ки нисбат ба таълиму тарбия, таъмини амнияти фарзандон, риояи қонун ва қоидаҳои ҳаракат дар роҳ бетараф набошанд.

Манбаъ навиштааст, ки солҳои охир дар рӯзҳои таҷлили хатми мактаб ҳолатҳои идора намудани воситаҳои нақлиёт аз ҷониби ноболиғон ба қайд гирифта мешаванд, ки аксаран сабаби рух додани садамаҳои нақлиётӣ, ҷароҳатбардорӣ ва дигар оқибатҳои фоҷиабор мегарданд.

“Тассуфовар аст, ки дар бисёр мавридҳо наврасон бо ризоият ё бепарвоии калонсолон ба воситаи нақлиёт дастрасӣ пайдо мекунанд. Нақлиёт воситаи бозӣ ё намоиши «хатми бошукуҳ» набуда, манбаи хатар барои наврасон ба ҳисоб меравад”, - афзудааст Раёсати ВКД дар шаҳри Душанбе.

Dialog.tj