Бинобар иттилои Раёсати Вазорати корҳои дохилӣ дар шаҳри Душанбе, аз ҷониби кормандони ШВКД-2 дар ноҳияи Фирдавсӣ як ҳолати ташкили фасодхона ошкор карда шуд.

Ба навиштаи манбаъ, шаҳрванд Амирова Дилрабо, соли таваллудаш 1988, дар кӯчаи Н.Қарабоев манзили истиқоматиеро ба иҷора гирифта, бо мақсади ба даст овардани манфиати молиявӣ барои истеъмоли воситаҳои нашъадор шароит фароҳам овардааст.

Гуфта мешавад, ки дар натиҷаи чорабиниҳои оперативӣ, истеъмолкунандагони воситаҳои нашъадор шаҳрвандон Ниёзов Фирдавс, Одинаев Сайдалӣ, инчунин, ноболиғон Каримова Хайриниссо ва Аҳмадиева Сабрина низ дастгир карда шуданд.

Зикр мегардад, ки зимни кофтуков аз номбурдагон миқдори хурди воситаҳои нашъадори навъҳои «Метамфетамин» ва «Ҳашиш», ҳамзамон, таҷҳизоти барои истеъмоли воситаҳои нашъадор истифодашаванда ҳамчун далели шайъӣ дарёфт ва мусодира карда шуд.

Манбаъ меафзояд, ки вобаста ба ҳолати мазкур маводи зарурӣ тартиб дода шуда, тафтиши пешакӣ қарор дорад.

Ҳамчунин, нисбат ба соҳибмулки манзили истиқоматӣ барои ба нашъамандон вогузор намудани манзил чораҳои қонунӣ андешида мешавад.

Dialog.tj