Тибқи иттилои Агентии инноватсия ва технологияҳои рақамӣ, дар кишвар мактаби технологияҳои рақамии «Школа 21» таъсис меёбад.

Манбаъ меафзояд, ки дар мактаби мазкур шаҳрвандони аз 18-сола боло метавонанд ба таври ройгон касбҳои муосири соҳаи технологияҳои иттилоотиро омӯзанд ва дар оянда ҳамчун муҳандисони рақамӣ фаъолият намоянд.

Гуфта мешавад, ки мактаб барои 200 ҷойи таҳсил пешбинӣ шуда, таҳсил ба таври шабонарӯзӣ ба роҳ монда мешавад ва иштирокчиён метавонанд дар вақти барояшон мувофиқ омӯзиш гиранд.

“Давраи асосии таҳсил вобаста ба самт ва суръати омӯзиш аз 9 моҳ то 2 сол идома меёбад. Дар мактаб усули муосири «ҳамсол ба ҳамсол» истифода мешавад, ки дар доираи он донишҷӯён таҷриба ва донишҳои худро мубодила намуда, лоиҳаҳои инфиродӣ ва гурӯҳиро амалӣ менамоянд”, - меафзояд манбаъ.

Иттилоъ дода мешавад, ки мактаби технологияҳои рақамии «Школа 21» бахшида ба 35-солагии Истиқлоли давлатии Ҷумҳурии Тоҷикистон бо ташаббуси Агентии инноватсия ва технологияҳои рақамӣ дар ҳамкорӣ бо Хадамоти алоқаи назди Ҳукумати Ҷумҳурии Тоҷикистон ва Сберобразование дар шаҳри Душанбе таъсис дода мешавад.

Dialog.tj