Владимир Путин, раиси ҷумҳури Русия дар сафари худ ба Чин гуфта, ки тамаркузи аслии ду ҷониб, рӯйи масоили иқтисодӣ аст.

Хабаргузории “РИА Новости” рӯзи чаҳоршанбе, 20 –уми май гузориш дода, ки Владимир Путин, раиси ҷумҳури Русия, ва Си Ҷинпин, раиси ҷумҳури Чин, гуфтугӯҳоро дар Пекин оғоз кардаанд.

Бар асоси гузориш, Путин гуфта, ки равобит миёни Русия ва Чин ба “сатҳе бесобиқа” расида ва ҳаҷми тиҷорати дуҷониба дар 25 соли гузашта беш аз сӣ баробар афзоиш ёфтааст.

Путин гуфтааст: “Тибқи тавофуқ бо раиси ҷумҳури Чин, кори худро бо баррасии масоили калидии ҳамкории дуҷониба оғоз хоҳем кард ва тамаркузи аслӣ бар иқтисод хоҳад буд ва сипас, музокирот бо ҳузури ҳайатҳо идома меёбад”.

Гуфта шудааст, ки ҳайати ҳамроҳи Путин дар ин сафар, шомили мақомоти давлатӣ ва раҳбарони тиҷоратӣ аст.

Путин ҳамчунин, афзуда, ки бо вуҷуди чолишҳои хориҷӣ, ҳамкории иқтисодӣ миёни Русия ва Чин ҳамчунон қудратманд мондааст.

Гуфта мешавад, ки Чин яке аз бузургтарин муштариҳои нафт аз Русия мебошад ва дар гузашта бо таҳримҳои нафтии Амрико алайҳи Маскав мухолифат кардааст.

Dialog.tj