Дар асоси қарори раиси шаҳри Душанбе 19-уми май дар пойтахт «Ҳафтаи илм, технология, инноватсия ва ихтироъкории наврасону ҷавонони шаҳри Душанбе» бо номи «35 соли Истиқлол: ояндаи рақамӣ аз диди наврасону ҷавонон» оғоз шуд.

Тавре ки иттилоъ дода мешавад, ҳафтаи илм бо мақсади баланд бардоштани сатҳу сифати таҳсилот, бедор намудани шавқу рағбати хонандагон ба эҷодкорӣ, навоварӣ ва ихтироъкорӣ, омӯзиши амиқи илмҳои дақиқ, ташаккули фарҳанги техникӣ, тарғиби истифодаи самараноки технологияҳои иттилоотӣ ва дастгирии наврасону ҷавонони соҳибистеъдод баргузор карда мешавад.

Таъкид мегардад, ки ин иқдом ба дарёфт ва муаррифии истеъдодҳои нав, таҳкими тафаккури илмӣ ва тавсеаи муҳити инноватсионӣ дар байни хонандагон ва омӯзгорони муассисаҳои таҳсилоти умумии пойтахт равона шудааст.

Гуфта мешавад, ки тибқи нақшаи тасдиқшуда, дар доираи Ҳафтаи илм як қатор чорабиниҳои соҳавӣ, аз ҷумла намоишгоҳ, IT-машварат, форуми наврасони асри технология, озмуни шаҳрии «Илм ва амал», ҷамъияти илмии хонандагон, озмуни шаҳрии «Омӯзгори муосир», муҳорибаи роботҳо ва дигар барномаҳои тарбиявию маърифатӣ баргузор мегарданд.

Ёдовар мешавем, ки «Ҳафтаи илм, технология, инноватсия ва ихтироъкории наврасону ҷавонони шаҳри Душанбе» то 23-юми май идома меёбад.

Dialog.tj